Open Museums

Open Museums

A Fundación Rosalía lidera un proxecto europeo de formación na transformación dixital para museos. Está a traballar neste tema canda outros socios de Italia, Países Baixos, Grecia e Galicia. Trátase dun proxecto de formación en dixitalización para o persoal de museos de Europa.

A Fundación Rosalía de Castro está a traballar no proxecto europeo de formación ‘Open Museums. European Museums stay open through digital technologies’ (Museos Abertos. Os museos europeos mantéñense abertos a través das tecnoloxías dixitais) que lidera, en colaboración con socios de Italia (Insieme per Camminare, Países Baixos (Atermon), Grecia (IDEC e Laografiki Etaireia Varnava) e Galicia (EidosD). Trátase do primeiro proxecto europeo no que participa esta institución.

Este proxecto, que forma parte do programa Erasmus Plus de formación, ten como obxectivo actualizar os coñecementos e competencias dixitais dos traballadores dos museos europeos, alén de promover o acceso dixital aos museos, preservar o patrimonio cultural que gardan e contribuír a mellorar a súa comunicación dixital e financiamento nesta nova normalidade. 

Este proxecto, que se está a desenvolver desde marzo de 2021 ata finais de 2022, está a elaborar unha Guía de Competencias que inclúe os coñecementos necesarios para crear visitas virtuais, dotarse dunha política de comunicación dixital e desenvolver tendas virtuais de museo. Ademais, creará un curso en liña que lle permitirá aos profesionais e interesadas aprender a crear estas ferramentas a través de módulos prácticos e inclusivos, con casos reais e exercicios prácticos.

O proxecto inclúe tamén un evento formativo para os socios en Rossano (Italia) e eventos abertos ao público en Padrón, Rossano (Italia), Varnavas e Pireo (Grecia) e Rotterdam (Países Baixos). Tamén colaborarán outros museos literarios galegos como a Fundación Uxío Novoneyra.

Poden obter máis información na web do proxecto Open Museums.